Zob və ya qalxanvari vəzi xəstəliyiniz varsa, ilk öncə həkimə müraciət etməlisiniz. Müalicə həkimi sizi müayinə etdikdən sonra bir sıra testlərdən keçirir və müalicə təyin edir.
Zob xəstəliyinizin daha yaxşı müalicə olunmasında həkim qədər siz də rol oynayırsınız. Bununla bağlı aşağıdakılara nəzərə almağınız tövsiyə edilir:
- Qalxanabənzər vəzi ilə bağlı aparılan laboratoriya müayinələrinin bir nüsxəsini özünüzdə saxlayın. Həkiminiz testləri sizdən istədikdə, onların surətini çıxararaq qovluğunuzda saxlayın.
- Müayinələrdən eyni laboratoriyada keçməyiniz tövsiyə edilir. Seçdiyiniz laboratoriyada hormonların səviyyəsinin düzgün ölçülməsinə diqqət yetirin.
- Sərbəst T3 və T4 tireoid hormonlarının səviyyəsinin ölçülməsi daha məqsədəuyğundur. Total T3 və Td tireoid hormanlarını həkim tövsiyə etmədiyi müddətcə ölçdürməyin.
- Bir qovluq hazırlayın və müayinələrinizin cavablarını bu qovluqda tarixə görə sıralayın. Hər dəfə həkim qəbuluna getdiyiniz vaxt bu qovluğu da özünüzlə götürün.
- Tireoid üçün dərmanlar istifadə edirsinizsə, bir neçə dəfə dozanı vaxtında qəbul etmədikdə bu barədə həkiminizi mütləq məlumatlandırın.
- Həkiminiz tireoid iynə biopsiyası təyin etdikdə, qorxmadan mütləq həkimə gedin. Bəzən biopsiya təyin etdiyimiz xəstələri xəstəxanamızda daha görmürük. Əslində bu xəstələr sağlamlıqlarını təhlükə altında qoyduqlarının fərqində olmurlar.
- Qalxanvari vəzidən başqa xəstəlik üçün əməliyyat olunacaqsınızsa, bunu mütləq həkiminizə, cərraha və anesteziya mütəxəssisinə bildirin.Əməliyyatdan öncə tireoid hormanları müayinə olunmalıdır.
- Zob əməliyyatı olunmusunuzsa, mütləq vaxtaşırı olaraq həkimin qəbulunda olun. Bəzi xəstələr əməliyyat olunduqdan sonra təkrar müayinəyə getmirlər.Əməliyyat olunmuş xəstələrdə bəzən qanda kalsiumun miqdarı azala, hormon səviyyəsində azalma və ya artma ola bilər və ya düyün yenidən inkişaf edə bilər.
- Qalxanvari vəzi xərçənginiz varsa, ömrünüz boyu müntəzəm olaraq həkim qəbulunda olmalısınız. Skan müayinələrdən keçməyi, hormon səviyyəsini ölçdürməyi, qanda tireoqlobulin və anti-tireoqlobulin antitelinin miqdarını ölçdürməyi unutmayın.
- Əksər qalxanvari vəzi xəstəlikləri genetik yolla keçdiyindən, uşaqlarınızı, qohumlarınızı və ailə üzvlərinizi bu barədə məlumatlandırın və onların da qalxanvari vəzi müayinələrindən keçməli olduqlarını bildirin.
- Hamiləlik planlaşdıran zob xəstəliyi olan qadınlar həkimini bu barədə məlumatlandırmalıdır. Hamiləlikdə qalxanavari vəzi hormanlarını daha tez-tez müayinə ediləcək.
- Tərkibində levotiroksin olan dərmanlardan istifadə edən qadınlarda xüsusilə klimaks və ya menopauza dövründə tireoid stimulə edici hormon (TSH) səviyyəsi ciddi nəzarət altında saxlanılmalıdır. Dərman dozası yüksək olduqda və tireoid stimulə edici hormon (TSH) səviyyəsi çox azaldıqda, sümük əriməsi baş verə bilər. Buna görə də, həkiminiz müəyyən etdiyi vaxtlarda sümüklərinizi müayinə etdirin və kalsium qəbul edin.
- Qalxanabənzər vəziniz normadan çox işləyir və buna görə də, propiltiourasil və ya metimazol dərmanlarından hər hansı birini qəbul edirsinizsə, həkiminizlə məsləhətləşmədən dərmanın istifadəsini dayandırmayın.
- Başqa dərmanlar istifadə edirsinizsə və ya istifadə etməyi düşünürsünüzsə, bu dərmanlarla müalicəyə başlayacağınız dərmanların eyni anda istifadəsinin uyğun olub-olmadınığını həkiminizlə məsləhətləşdirin.
- Həkimin qəbulunda olarkən şikayətlərin necə və nə vaxt yarandığını, necə özünü büruzə verdiyi, daha əvvəl aldığınız müalicələr və istifadə etdiyiniz dərmanlar barədə həkimə ətraflı məlumat verin. Ailənizin hər hansı birində zob xəstəliyinin olub-olmadığını həkiminizə bildirin.
- Müayinəyə gedərkən boğazı açıq geyim geyinin. Boyununuzu bağlayan sviterlər geyinməyin.
